ආත්මය මියගිය පසු...

මළදාට මගෙ තනිය මකන්නට දෙයක්        නෑ
පණගැහෙන කාලෙවත් නුඹ දුන්නු දෙයක් නෑ
දෙණ බදන් වැළපුනත් දැන් ඉතිං වැඩක්      නෑ
වේලිච්ච මළකඳට දැනෙන කිසි දෙයක්        නෑ

ප.ලි.
ආත්මය මියගිය පසු...
අප, සුසානය තෙක් ඇවිදයන...

මළවුන් වෙමු!


(2023 දෙසැම්බර්)

ප්‍රේමයේ වැඩි උරුමය මතු පරපුරට ය!

ගංදිය කිසිදින ඉහලට        ගැලුවාද?
ගස් වැල් වල මුල් ඉහළට   ඇදුනා ද?
නුග බිජු ගස මුල විතරක් පැලවේද?
සමහර දරුවන් ලොවටය දායාද ...

සිතිවිලි දැන් රැඩිකල් මදිවා       වත්ද?
නොස්ටැල්ජික් සිත ගම-රට දිව යා ද?
ප්‍රේමය මතු පරපුර උදෙසා        නේද?
මව්පිය පෙම දරුවන්ටය දායාද ...

(2021 දෙසැම්බර්)

මෙ...රු

ඉරේ දිළුම අහසට වැඩි නැතුවාය

        මහමෙර උනත් පොළොවට බර නැතුවාය 

සුළි සුළඟටත් බට ලඳු ඉවසුම් දේය

        රැව්වත් ගෙරෙව්වත් නුඹේ පෙම අඩු නෑය...

(2021 අප්‍රේල්)

හීන

තරු නැති කරුවල අහසක නුඹ මැද දිලිසිච්ච...

       තිසිජය ළඟ ලා තරුවක් හෙම තිබුනෙම නැද්ද?

මං දුටු හැම හීනෙම උඹ මලසුන මැද පිච්ච...
       එකමෙක හීනෙක වත් උඹ මා දුටුවෙම නැද්ද?

(2021 මාර්තු)

ගෝජස් මල්

මලක් ගෝජස්(gorgeous) තමයි පිණි බින්දු හැලුනාම
සමනල්ලූ දැවටෙන්නේ හොඳින් ඔප           වැටුණාම
බඹරු එහෙමත් සිඹියි මකරන්ද                  පිරුණාම
කොමළ මල් දැඩි වෙන්නෙ ජීවිතය                 දුටුවාම

(2021 මාර්තු)

සුභ-අසුභ

නෙක නෙක පද ඇමිණීම
පදයෙන් පදය      ගෙතීම
කරුණක් ලඝුව      දැකීම
හරි අසුභයි කාටත්...

කන්දක් කෙන්ද      කිරීම
කිඹුලන් කොරහෙ දැකීම
කබරයි තලගොයි      වීම
සුභ නෑ නෙව කාටත්...

විචාරවත් බව        සේම
හොඳහැටි තර්ක කිරීම
කරුණක් ඍජුව  දැකීම
හරිම සුභයි කාටත්...

(2020 මැයි)

ජරමරේ

රකින්න බඩ ගෝස්තරේ

වික්කම මගේ සාස්තරේ

කළුවරේ

මොකදෑ බරබරේ...

(2019 ජූලි)